ពោធិ៍សាត់៖ នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត បានស្នើដល់យុវជនទាំងអស់ឲ្យរក្សានូវសេចក្ដីថ្លៃថ្នូរគោរពដល់ស្រ្តី និងក្មេងស្រី ជាពិសេសក្នុងរដូវកាលនៃពិធីបុណ្យចូលឆ្នាំខ្មែរខាងមុខ។
ថ្លែងនៅក្នុងពិធីសម្ពោធព្រះបុទុមចេតិយ នៅក្នុងវត្តមុណីរតនារាម ក្នុងក្រុងពោធិ៍សាត់ ខេត្តពោធិ៍សាត់ព្រឹកថ្ងៃអាទិត្យ ទី៣១ ខែមីនា ឆ្នាំ២០២៤ សម្ដេចធិបតី ហ៊ុន ម៉ាណែត ថាមិនមែនជារឿងសមគួរនោះទេដែលក្មេងប្រុសមួយចំនួនឆ្លៀតឱកាសនៃពិធីបុណ្យចូលឆ្នាំខ្មែរដើម្បីលូកលាន់ ឬធ្វើឲ្យប៉ះពាល់ដល់សេចក្ដីថ្លៃថ្នូររបស់ក្មេងស្រីនោះ។
ជាមួយគ្នានេះសម្ដេចក៏បានបញ្ជាទៅដល់អាជ្ញាធរមូលដ្ឋានទាំងអស់ត្រូវមានការរៀបចំសណ្ដាប់ធ្នាប់ឲ្យបានល្អ និងការរៀបចំពិធីបុណ្យចូលឆ្នាំខ្មែរឲ្យបានរលូនផងដែរ។
